ﺟﺪﯾﺪ ﻣﻐﺮﺑﯽ ﻓﮑﺮ

ﻏﻠﺒﮧ ﻣﻐﺮﺏ ﮐﯽ ﻧﻮﻋﯿﺖ ﻭ ﻣﺎﮨﯿﺖ ﮐﯽ ﮐﻮﺋﯽ ﺗﻔﮩﯿﻢ ﺍﺱ ﻓﮑﺮﯼ ﻭ ﺍﻋﺘﻘﺎﺩﯼ ﭼﯿﻠﻨﺞ ﮐﺎ ﺫﮐﺮ ﮐﯿﮯ ﺑﻐﯿﺮ ﻣﮑﻤﻞ ﻧﮩﯿﮟ ﮨﻮ ﺳﮑﺘﯽ ﺟﻮ ﺟﺪﯾﺪ ﻣﻐﺮﺑﯽ ﻓﮑﺮ ﻧﮯ ﻣﺬﮨﺐ ﺍﻭﺭ ﻣﺬﮨﺒﯽ ﺍﻋﺘﻘﺎﺩﺍﺕ ﮐﮯ ﺣﻮﺍﻟﮯ ﺳﮯ ﮐﮭﮍﺍ ﮐﺮ ﺩﯾﺎ ﮨﮯ۔ ﺍﺱ ﭼﯿﻠﻨﺞ ﮐﻮ ﺩﺭﺳﺖ ﻃﻮﺭ ﭘﺮ ﺳﻤﺠﮭﻨﮯ ﮐﮯ ﻟﯿﮯ ﺟﺪﯾﺪ ﻣﻐﺮﺑﯽ ﻓﮑﺮ ﮐﮯ ﺍﺭﺗﻘﺎ ﭘﺮ ﻧﻈﺮ ﺭﮐﮭﻨﺎ ﺿﺮﻭﺭﯼ ﮨﮯ ﺟﻮ ﻗﺮﻭﻥ ﻭﺳﻄﯽٰ ﻣﯿﮟ ﺍﺑﺘﺪﺍﺀ ﻣﺴﯿﺤﯽ ﻣﺬﮨﺒﯽ ﻓﮑﺮ ﺳﮯ ﺑﮯﺍﻋﺘﻨﺎﺋﯽ ﺍﻭﺭ ﺑﻌﺪ ﺍﺯﺍﮞ ﺍﺱ ﮐﮯ ﺧﻼﻑ ﺑﻐﺎﻭﺕ ﮐﮯ ﻧﺘﯿﺠﮯ ﻣﯿﮟ ﻭﺟﻮﺩ ﻣﯿﮟ ﺁﺋﯽ۔ ﻧﺸﺎۃ ﺛﺎﻧﯿﮧ ﮐﯽ ﺗﺤﺮﯾﮏ ﮐﮯ ﺯﯾﺮ ﺍﺛﺮ ﻣﻐﺮﺑﯽ ﻓﮑﺮ ﻣﯿﮟ ﮐﺎﺋﻨﺎﺕ ﺍﻭﺭ ﺍﻧﺴﺎﻥ ﮐﮯ ﺣﻮﺍﻟﮯ ﺳﮯ ﺍﮨﻢ ﺗﺮﯾﻦ ﺳﻮﺍﻻﺕ ﮐﺎ ﺟﻮﺍﺏ ﻣﺬﮨﺐ ﺳﮯ ﻗﻄﻊ ﻧﻈﺮ ﮐﺮﺗﮯ ﮨﻮﺋﮯ ﻣﺤﺾ ﻋﻘﻞ، ﺍﻧﺴﺎﻧﯽ ﻓﻄﺮﺕ، ﻓﻠﺴﻔﯿﺎﻧﮧ ﻏﻮﺭ ﻭﻓﮑﺮ ﺍﻭﺭ ﺗﺠﺮﺑﮧ ﻭ ﻣﺸﺎﮨﺪﮦ ﺳﮯ ﺣﺎﺻﻞ ﺷﺪﮦ ﻣﻌﻠﻮﻣﺎﺕ ﮐﯽ ﺑﻨﯿﺎﺩ ﭘﺮ ﺗﻼﺵ ﮐﺮﻧﮯ ﮐﺎ ﺭﺟﺤﺎﻥ ﭘﯿﺪﺍ ﮨﻮﺍ۔ ﺍﺱ ﺭﺟﺤﺎﻥ ﻧﮯ ﺍﺑﺘﺪﺍ ﻣﯿﮟ ﻣﺬﮨﺐ ﮐﯽ ﺣﻘﯿﻘﺖ ﺍﻭﺭ ﻣﺬﮨﺒﯽ ﺷﻌﻮﺭ ﮐﺎ ﻓﯽ ﻧﻔﺴﮧ ﺍﻧﮑﺎﺭ ﮐﺮﻧﮯ ﮐﮯ ﺑﺠﺎﺋﮯ ” ﻓﻄﺮﯼ ﻣﺬﮨﺐ “ ﮐﮯ ﻓﻠﺴﻔﮧ ﮐﯽ ﺷﮑﻞ ﺍﺧﺘﯿﺎﺭ ﮐﯽ ﺍﻭﺭ ﺭﻭﺍﯾﺘﯽ ﻣﺬﺍﮨﺐ ﮐﻮ ﻣﺬﮨﺒﯽ ﺗﺠﺮﺑﮧ ﻭ ﺍﺣﺴﺎﺱ ﮐﺎ ﺣﺘﻤﯽ ﻣﺎﺧﺬ ﺗﺴﻠﯿﻢ ﮐﺮﻧﮯ ﮐﮯ ﺑﺠﺎﺋﮯ ﺍﻧﺴﺎﻥ ﮐﮯ ﻓﻄﺮﯼ ﺍﺣﺴﺎﺳﺎﺕ ﭘﺮ ﺍﻧﺤﺼﺎﺭ ﮐﺮﻧﮯ ﭘﺮ ﺯﻭﺭ ﺩﯾﺎ۔ ﺁﮔﮯ ﭼﻞ ﮐﺮ ﺍﭨﮭﺎﺭﮨﻮﯾﮟ ﺻﺪﯼ ﻣﯿﮟ ﺗﺤﺮﯾﮏ ﺗﻨﻮﯾﺮ ﻣﯿﮟ ﻣﺬﮨﺒﯽ ﺗﺼﻮﺭ ﮐﺎﺋﻨﺎﺕ ﻭ ﺗﺼﻮﺭ ﺍﻧﺴﺎﻥ ﮐﻮ ﺑﺎﻟﮑﻠﯿﮧ ﻣﺴﺘﺮﺩ ﮐﺮ ﺩﯾﺎ ﮔﯿﺎ ﺍﻭﺭ ﻣﺬﮨﺒﯽ ﻋﻠﻢ ﮐﻮ ﮐﺴﯽ ﺑﮭﯽ ﺩﺭﺟﮯ ﻣﯿﮟ ﺣﻘﯿﻘﺖ ﮐﯽ ﻣﻌﺮﻓﺖ ﮐﺎ ﮐﻮﺋﯽ ﺫﺭﯾﻌﮧ ﺗﺴﻠﯿﻢ ﻧﮧ ﮐﺮﺗﮯ ﮨﻮﺋﮯ ﺍﻧﺴﺎﻥ ﮐﮯ ﺩﻭﺭ ﺟﮩﺎﻟﺖ ﮐﯽ ﭘﯿﺪﺍﻭﺍﺭ ﻗﺮﺍﺭ ﺩﯾﺎ ﮔﯿﺎ۔ ﻣﺬﮨﺐ ﮐﻮ ﺯﻣﺎﻧﮧ ﻗﺪﯾﻢ ﮐﮯ ﺗﻮﮨﻤﺎﺕ ﺳﮯ ﭘﯿﺪﺍ ﺷﺪﮦ ﺟﮩﺎﻟﺖ ﮐﮯ ﮨﻢ ﻣﻌﻨﯽ ﺍﻭﺭ ﺳﺎﺋﻨﺲ ﮐﮯ ﺩﺭﯾﺎﻓﺖ ﮐﺮﺩﮦ ﺗﺎﺯﮦ ﺣﻘﺎﺋﻖ ﺳﮯ ﻣﺘﺼﺎﺩﻡ ﮨﻮﻧﮯ ﮐﯽ ﺑﻨﯿﺎﺩ ﭘﺮ ﺳﺮﮮ ﺳﮯ ﻧﺎﻗﺎﺑﻞ ﺍﻟﺘﻔﺎﺕ ﺗﺼﻮﺭ ﮐﯿﺎ ﺟﺎﻧﮯ ﻟﮕﺎ۔ ﺍﺱ ﻃﺮﺯ ﻓﮑﺮ ﮐﮯ ﻣﻨﻄﻘﯽ ﻧﺘﯿﺠﮯ ﻃﻮﺭ ﭘﺮ ﻣﻐﺮﺑﯽ ﺫﮨﻦ ﺗﻤﺎﻡ ﮐﺎﺋﻨﺎﺗﯽ، ﻧﻔﺴﯽ ﺍﻭﺭ ﺳﻤﺎﺟﯽ ﻣﻈﺎﮨﺮ ﮐﯽ ﺗﻮﺟﯿﮧ ﮐﮯ ﻟﯿﮯ ﻣﺘﺒﺎﺩﻝ ﻧﻈﺮﯾﺎﺕ ﺍﻭﺭ ﻓﻠﺴﻔﻮﮞ ﮐﯽ ﻃﺮﻑ ﻣﺘﻮﺟﮧ ﮨﻮﺍ ﺍﻭﺭ ﯾﻮﮞ ﺭﻓﺘﮧ ﺭﻓﺘﮧ ﺣﯿﺎﺕ ﻭﮐﺎﺋﻨﺎﺕ ﺳﮯ ﻣﺘﻌﻠﻖ ﻣﺬﮨﺒﯽ ﻧﻈﺮﯾﮯ ﮐﯽ ﻣﮑﻤﻞ ﻧﻔﯽ ﮐﺮ ﮐﮯ ﻻ ﺩﯾﻨﯽ ﻧﻈﺮﯾﺎﺕ ﺍﻭﺭ ﻓﻠﺴﻔﻮﮞ ﭘﺮ ﺍﺳﺘﻮﺍﺭ ﻋﻠﻮﻡ ﻭﻓﻨﻮﻥ ﮐﺎ ﺍﯾﮏ ﭘﻮﺭﺍ ﻧﻈﺎﻡ ﮐﮭﮍﺍ ﮐﺮ ﺩﯾﺎ ﮔﯿﺎ ﺟﻮ ﺍﻧﺴﺎﻧﯽ ﻓﮑﺮ ﻭﻋﻤﻞ ﮐﮯ ﮨﺮ ﮨﺮ ﺩﺍﺋﺮﮮ ﮐﯽ ﺍﯾﮏ ﺧﺎﺹ ﺭﺥ ﭘﺮ ﺗﺸﮑﯿﻞ ﮐﺮﺗﺎ ﮨﮯ ﺍﻭﺭ ﺟﺲ ﻣﯿﮟ ﻣﺬﮨﺒﯽ ﻓﮑﺮ ﯾﺎ ﻣﺬﮨﺒﯽ ﺗﺼﻮﺭﺍﺕ ﺍﺏ ﺣﯿﺎﺕ ﻭﮐﺎﺋﻨﺎﺕ ﮐﯽ ﺗﻔﮩﯿﻢ ﮐﮯ ﻟﯿﮯ ﺯﺍﻭﯾﮧ ﻧﻈﺮ ﻓﺮﺍﮨﻢ ﮐﺮﻧﮯ ﮐﮯ ﺑﺠﺎﺋﮯ ﺧﻮﺩ ﺍﻧﺴﺎﻧﯽ ﻓﮑﺮ ﮐﮯ ﺍﯾﮏ ﻣﻌﺮﻭﺽ ‏( Subject ‏) ﮐﯽ ﺣﯿﺜﯿﺖ ﺳﮯ ﺯﯾﺮ ﻏﻮﺭ ﺁﺗﮯ ﮨﯿﮟ۔ ﺟﺪﯾﺪ ﻣﻐﺮﺑﯽ ﻓﮑﺮ ﮐﮯ ﺗﻤﺎﻡ ﺍﮨﻢ ﺗﺼﻮﺭﺍﺕ، ﻧﻈﺮﯾﺎﺕ، ﻓﻠﺴﻔﮯ ﺍﻭﺭ ﻓﮑﺮﯼ ﺗﺤﺮﯾﮑﺎﺕ ﺑﻨﯿﺎﺩﯼ ﻃﻮﺭ ﭘﺮ ﻣﺬﮨﺐ ﺍﻭﺭ ﻣﺬﮨﺒﯽ ﻋﻠﻢ ﺳﮯ ﺑﻐﺎﻭﺕ ﭘﺮ ﻣﺒﻨﯽ ﮨﯿﮟ ﺍﻭﺭ ﺍﻥ ﮐﺎ ﺍﺳﺎﺳﯽ ﻣﺤﺮﮎ ﺍﻧﺴﺎﻧﯽ ﺫﮨﻦ ﮐﮯ ﺳﺎﻣﻨﮯ ﻣﺬﮨﺒﯽ ﻣﻘﺪﻣﺎﺕ ﮐﮯ ﻣﺘﺒﺎﺩﻝ ﻣﻘﺪﻣﺎﺕ ﭘﯿﺶ ﮐﺮﻧﺎ ﺭﮨﺎ ﮨﮯ۔
ﻇﺎﮨﺮ ﮨﮯ ﮐﮧ ﯾﮧ ﺻﻮﺭﺕ ﺣﺎﻝ ﺑﻄﻮﺭ ﺍﯾﮏ ﻣﺬﮨﺐ ﺍﻭﺭ ﺑﻄﻮﺭ ﺍﯾﮏ ﮐﺎﻣﻞ ﺗﺼﻮﺭ ﺣﯿﺎﺕ، ﺍﺳﻼﻡ ﮐﮯ ﻟﯿﮯ ﺍﯾﮏ ﺯﺑﺮﺩﺳﺖ ﭼﯿﻠﻨﺞ ﮐﺎ ﺩﺭﺟﮧ ﺭﮐﮭﺘﯽ ﮨﮯ، ﺍﻭﺭ ﺍﺱ ﮐﺎ ﺳﺎﻣﻨﺎ ﮐﺮﻧﺎ ﻣﺴﻠﻢ ﻓﮑﺮ ﻭ ﺩﺍﻧﺶ ﮐﯽ ﺍﻭﻟﯿﻦ ﺫﻣﮧ ﺩﺍﺭﯼ ﻗﺮﺍﺭ ﭘﺎﺗﯽ ﮨﮯ۔ ﺍﺱ ﺫﻣﮧ ﺩﺍﺭﯼ ﺳﮯ ﻋﮩﺪﮦ ﺑﺮﺁ ﮨﻮﻧﮯ ﮐﺎ ﺍﯾﮏ ﺑﻨﯿﺎﺩﯼ ﺍﻭﺭ ﺍﮨﻢ ﺩﺍﺋﺮﮦ ﺗﻮ ﻋﻠﻢ ﺍﻟﮑﻼﻡ ﮨﮯ۔ ﻋﻠﻢ ﺍﻟﮑﻼﻡ ﮐﯽ ﺍﺻﻄﻼﺡ ﻋﻠﻤﯽ ﻭ ﻓﻨﯽ ﻟﺤﺎﻅ ﺳﮯ ﺍﯾﺴﮯ ﺟﺪﻟﯿﺎﺗﯽ ﻣﺒﺎﺣﺚ ﮐﮯ ﻟﯿﮯ ﺍﺳﺘﻌﻤﺎﻝ ﮐﯽ ﺟﺎﺗﯽ ﮨﮯ ﺟﻦ ﻣﯿﮟ ﮐﺴﯽ ﻣﺨﺼﻮﺹ ﺍﻟٰﮩﯿﺎﺗﯽ ﺍﻭﺭ ﺍﻋﺘﻘﺎﺩﯼ ﻣﺴﺌﻠﮯ ﮐﺎ ﺍﺛﺒﺎﺕ ﯾﺎ ﺗﺮﺩﯾﺪ ﻣﻘﺼﻮﺩ ﮨﻮ۔ ﺗﺎﮨﻢ ﺍﭘﻨﮯ ﺍﺻﻞ ﻣﻘﺼﺪ ﮐﮯ ﻟﺤﺎﻅ ﺳﮯ ﺩﯾﮑﮭﺎ ﺟﺎﺋﮯ ﺗﻮ ﻣﺴﺎﺋﻞ ﻭ ﻣﺒﺎﺣﺚ ﮐﻮ ﺑﺮﺍﮦ ﺭﺍﺳﺖ ﻣﻮﺿﻮﻉ ﺑﺤﺚ ﺑﻨﺎﻧﮯ ﮐﮯ ﻋﻼﻭﮦ ﺍﯾﺴﯽ ﻋﻤﻮﻣﯽ ﺣﮑﻤﺖ ﻋﻤﻠﯽ ﻭﺿﻊ ﮐﺮﻧﺎ ﺍﻭﺭ ﺍﺱ ﮐﮯ ﺧﻂ ﻭ ﺧﺎﻝ ﮐﯽ ﻭﺿﺎﺣﺖ ﮐﺮﻧﺎ ﺑﮭﯽ ﺍﺱ ﻋﻠﻢ ﮐﮯ ﺩﺍﺋﺮﮮ ﻣﯿﮟ ﮨﯽ ﺷﻤﺎﺭ ﮨﻮﮔﺎ ﺟﺲ ﮐﺎ ﻣﻘﺼﺪ ﻏﻠﻂ ﻧﻈﺮﯾﺎﺕ ﺍﻭﺭ ﺑﺎﻃﻞ ﻓﻠﺴﻔﻮﮞ ﮐﮯ ﻣﻨﻔﯽ ﺍﺛﺮ ﺳﮯ ﺫﮨﻨﻮﮞ ﮐﻮ ﺑﭽﺎﻧﺎ ﺍﻭﺭ ﺍﺳﻼﻣﯽ ﻋﻘﺎﺋﺪ ﻭﻧﻈﺮﯾﺎﺕ ﮐﯽ ﺣﻘﺎﻧﯿﺖ ﺍﻭﺭ ﺻﺪﺍﻗﺖ ﮐﺎ ﯾﻘﯿﻦ ﺩﻟﻮﮞ ﻣﯿﮟ ﺭﺍﺳﺦ ﮐﺮﻧﺎ ﮨﻮ۔ ﯾﮧ ﭘﮩﻠﻮ ﻋﺎﻡ ﻃﻮﺭ ﺳﮯ ﻋﻠﻢ ﺍﻟﮑﻼﻡ ﺳﮯ ﻣﺘﻌﻠﻖ ﺗﺤﺮﯾﺮﻭﮞ ﻣﯿﮟ ﺯﯾﺮ ﻏﻮﺭ ﻧﮩﯿﮟ ﻻﯾﺎ ﮔﯿﺎ، ﺟﺒﮑﮧ ﻏﻮﺭ ﮐﯿﺎ ﺟﺎﺋﮯ ﺗﻮ ﺍﻧﺴﺎﻧﻮﮞ ﮐﮯ ﻣﺰﺍﺟﻮﮞ ﺍﻭﺭ ﻃﺒﺎﺋﻊ ﮐﮯ ﻓﺮﻕ ﺍﻭﺭ ﺟﺪﯾﺪ ﺗﮩﺬﯾﺒﯽ ﻭﻧﻔﺴﯿﺎﺗﯽ ﺭﺟﺤﺎﻧﺎﺕ ﮐﮯ ﺗﻨﺎﻇﺮ ﻣﯿﮟ ﺍﯾﺴﮯ ﺭﺍﮦ ﻧﻤﺎ ﺍﺻﻮﻝ ﻣﺘﻌﯿﻦ ﮐﺮﻧﮯ ﮐﯽ ﺿﺮﻭﺭﺕ ﺍﺱ ﻋﻠﻢ ﮐﮯ ﺍﺻﻞ ﻣﻘﺼﺪ ﮐﮯ ﻟﺤﺎﻅ ﺳﮯ ﺑﮯ ﺣﺪ ﻭﺍﺿﺢ ﮨﮯ ﺟﻦ ﮐﯽ ﺭﻭﺷﻨﯽ ﻣﯿﮟ ﻣﻠﺤﺪﺍﻧﮧ ﻓﮑﺮ ﺳﮯ ﻣﺘﺎﺛﺮ ﺍﺫﮨﺎﻥ ﮐﻮ ﻣﺨﺘﻠﻒ ﺍﻭﺭ ﻣﺘﻨﻮﻉ ﻃﺮﯾﻘﮯ ﺍﺧﺘﯿﺎﺭ ﮐﺮﺗﮯ ﮨﻮﺋﮯ ﻣﺬﮨﺐ ﮐﯽ ﻃﺮﻑ ﻣﺎﺋﻞ ﮐﯿﺎ ﺟﺎ ﺳﮑﮯ ﺍﻭﺭ ﺍﻥ ﮐﮯ ﺫﮨﻨﻮﮞ ﺳﮯ ﺷﮑﻮﮎ ﻭﺷﺒﮩﺎﺕ ﮐﮯ ﮐﺎﻧﭩﮯ ﭼﻨﮯ ﺟﺎ ﺳﮑﯿﮟ۔
ﺍﺱ ﺿﻤﻦ ﻣﯿﮟ ﺗﺠﺮﺑﮯ ﺳﮯ ﯾﮧ ﺑﺎﺕ ﻭﺍﺿﺢ ﮨﻮﺗﯽ ﮨﮯ ﮐﮧ ﺟﺪﻟﯿﺎﺗﯽ ﺍﻧﺪﺍﺯ ﻣﯿﮟ ﺑﺮﺍﮦ ﺭﺍﺳﺖ ﮐﺴﯽ ﻣﺴﺌﻠﮯ ﭘﺮ ﻣﺒﺎﺣﺜﮧ ﯾﺎ ﻣﻨﺎﻇﺮﮦ ﮐﺎ ﻃﺮﯾﻘﮧ ﺑﯿﺸﺘﺮ ﺍﻓﺮﺍﺩ ﮐﮯ ﻟﯿﮯ ﺯﯾﺎﺩﮦ ﻣﻔﯿﺪ ﻧﮩﯿﮟ ﮨﻮﺗﺎ۔ ﻋﻠﻤﯽ ﻭ ﻋﻘﻠﯽ ﺑﺤﺚ ﻭ ﻣﺒﺎﺣﺜﮧ ﮐﯽ ﺍﯾﮏ ﺧﺎﺹ ﺳﻄﺢ ﭘﺮ ﺍﭘﻨﯽ ﺍﮨﻤﯿﺖ ﺍﻭﺭ ﺍﻓﺎﺩﯾﺖ ﮨﮯ ﺍﻭﺭ ﻓﮑﺮ ﻭ ﺩﺍﻧﺶ ﮐﯽ ﺳﻄﺢ ﭘﺮ ﻣﺆﺛﺮ ﻋﻘﻠﯽ ﺍﻧﺪﺍﺯ ﻣﯿﮟ ﺣﻖ ﮐﮯ ﺍﺛﺒﺎﺕ ﺍﻭﺭ ﺑﺎﻃﻞ ﮐﯽ ﺑﮯﻣﺎﺋﯿﮕﯽ ﻭﺍﺿﺢ ﮐﺮﻧﮯ ﮐﯽ ﺿﺮﻭﺭﺕ ﻭ ﺍﻓﺎﺩﯾﺖ ﺳﮯ ﺍﻧﮑﺎﺭ ﻧﮩﯿﮟ ﮐﯿﺎ ﺟﺎ ﺳﮑﺘﺎ، ﺗﺎﮨﻢ ﺟﮩﺎﮞ ﺗﮏ ﺍﻧﻔﺮﺍﺩﯼ ﺳﻄﺢ ﭘﺮ ﻣﺘﺎﺛﺮﯾﻦ ﮐﯽ ﺍﺻﻼﺡ ﮐﺎ ﺗﻌﻠﻖ ﮨﮯ ﺗﻮ ﺍﻥ ﮐﮯ ﻟﯿﮯ ﺑﺮﺍﮦ ﺭﺍﺳﺖ ﻣﻮﺿﻮﻉ ﭘﺮ ﻣﻨﺎﻇﺮﮦ ﯾﺎ ﻣﺒﺎﺣﺜﮧ ﮐﺎ ﻃﺮﯾﻘﮧ ﺑﺴﺎ ﺍﻭﻗﺎﺕ ﺍﻟﭩﺎ ﻧﻘﺼﺎﻥ ﺩﮦ ﺛﺎﺑﺖ ﮨﻮ ﺳﮑﺘﺎ ﮨﮯ۔ ﺍﺱ ﺿﻤﻦ ﻣﯿﮟ ﺑﯿﺴﻮﯾﮟ ﺻﺪﯼ ﮐﮯ ﻣﻤﺘﺎﺯ ﻋﺎﻟﻢ ﺍﻭﺭ ﺩﺍﻧﺶ ﻭﺭ ﻣﻮﻻﻧﺎ ﻋﺒﺪ ﺍﻟﻤﺎﺟﺪ ﺩﺭﯾﺎﺑﺎﺩﯼ ﻧﮯ ﺍﭘﻨﯽ ﺁﭖ ﺑﯿﺘﯽ ﻣﯿﮟ ﺟﻮ ﺍﭘﻨﮯ ﺫﺍﺗﯽ ﺗﺠﺮﺑﺎﺕ ﺑﯿﺎﻥ ﮐﯿﮯ ﮨﯿﮟ، ﻭﮦ ﺑﮯ ﺣﺪ ﻣﻔﯿﺪ ﺍﻭﺭ ﻗﺎﺑﻞ ﺗﻮﺟﮧ ﮨﯿﮟ ﺍﻭﺭ ﺍﻟﺤﺎﺩ ﺳﮯ ﻣﺘﺎﺛﺮ ﻧﺌﯽ ﻧﺴﻞ ﮐﻮ ﻣﺨﺎﻃﺐ ﺑﻨﺎﻧﮯ ﮐﮯ ﻟﯿﮯ ﻧﮩﺎﯾﺖ ﺍﮨﻢ ﻧﻔﺴﯿﺎﺗﯽ ﺍﻭﺭ ﺩﻋﻮﺗﯽ ﺍﺻﻮﻟﻮﮞ ﮐﯽ ﻧﺸﺎﻥ ﺩﮨﯽ ﮐﺮﺗﮯ ﮨﯿﮟ۔ ‏( ﺩﯾﮑﮭﯿﮯ : ﺁﭖ ﺑﯿﺘﯽ، ﻣﺠﻠﺲ ﻧﺸﺮﯾﺎﺕ ﺍﺳﻼﻡ ﮐﺮﺍﭼﯽ، ۱۹۹۶، ﺻﻔﺤﺎﺕ ۲۳۳ ﺗﺎ ۲۵۴ ‏(
ﺫﯾﻞ ﻣﯿﮟ ﻣﻮﻻﻧﺎ ﮐﯽ ﺁﭖ ﺑﯿﺘﯽ ﮐﮯ ﻣﺘﻌﻠﻘﮧ ﺍﺑﻮﺍﺏ ﺳﮯ ﭼﻨﺪ ﺍﻗﺘﺒﺎﺳﺎﺕ ﻧﻘﻞ ﮐﯿﮯ ﺟﺎﺗﮯ ﮨﯿﮟ :
” ﺍﯾﮏ ﻋﺰﯾﺰ ﮐﮯ ﭘﺎﺱ ﺍﯾﮏ ﺍﻧﮕﺮﯾﺰﯼ ﮐﺘﺎﺏ ﻣﺤﺾ ﺍﺗﻔﺎﻕ ﺳﮯ ﺩﯾﮑﮭﻨﮯ ﻣﯿﮟ ﺁ ﮔﺌﯽ۔ ﺟﻮﮞ ﺟﻮﮞ ﺁﮔﮯ ﺑﮍﮬﺘﺎ ﮔﯿﺎ، ﮔﻮﯾﺎ ﺍﯾﮏ ﻧﯿﺎ ﻋﺎﻟﻢ ﻋﻘﻠﯿﺎﺕ ﮐﺎ ﮐﮭﻠﺘﺎ ﮔﯿﺎ ﺍﻭﺭ ﻋﻘﺎﺋﺪ ﻭﺍﺧﻼﻕ ﮐﯽ ﭘﻮﺭﯼ ﭘﺮﺍﻧﯽ ﺩﻧﯿﺎ ﺟﯿﺴﮯ ﺯﯾﺮ ﻭ ﺯﺑﺮ ﮨﻮﺗﯽ ﭼﻠﯽ ﮔﺌﯽ ! ﮐﺘﺎﺏ ﻣﺬﮨﺐ ﭘﺮ ﻧﮧ ﺗﮭﯽ، ﻧﮧ ﺑﻈﺎﮨﺮ ﺍﺱ ﮐﺎ ﮐﻮﺋﯽ ﺗﻌﻠﻖ ﺍﺑﻄﺎﻝ ﺍﺳﻼﻡ ﯾﺎ ﺍﺑﻄﺎﻝ ﻣﺬﺍﮨﺐ ﺳﮯ ﺗﮭﺎ۔ ﺍﺻﻮﻝ ﻣﻌﺎﺷﺮﺕ ﻭﺁﺩﺍﺏ ﻣﻌﺎﺷﺮﺕ ﺗﮭﯽ۔ ﻧﺎﻡ ﺗﮭﺎ : Elements of Social Science ۔ ﮐﺘﺎﺏ ﮐﯿﺎ ﺗﮭﯽ، ﺍﯾﮏ ﺑﺎﺭﻭﺩ ﺑﭽﮭﯽ ﮨﻮﺋﯽ ﺳﺮﻧﮓ ﺗﮭﯽ۔ ﺣﻤﻠﮧ ﮐﺎ ﺍﺻﻞ ﮨﺪﻑ ﻭﮦ ﺍﺧﻼﻗﯽ ﺑﻨﺪﺷﯿﮟ ﺗﮭﯿﮟ ﺟﻨﮭﯿﮟ ﻣﺬﮨﺐ ﮐﯽ ﺩﻧﯿﺎ ﺍﺏ ﺗﮏ ﺑﻄﻮﺭ ﻋﻠﻮﻡ ﻣﺘﻌﺎﺭﻓﮧ ﮐﮯ ﭘﮑﮍﮮ ﮨﻮﺋﮯ ﮨﮯ ﺍﻭﺭ ﺍﻥ ﭘﺮ ﺍﭘﻨﮯ ﺍﺣﮑﺎﻡ ﮐﯽ ﺑﻨﯿﺎﺩ ﺭﮐﮭﮯ ﮨﻮﺋﮯ ﮨﮯ، ﻣﺜﻼً ﻋﻔﺖ ﻭﻋﺼﻤﺖ۔ ﮐﺘﺎﺏ ﮐﺎ ﺍﺻﻞ ﺣﻤﻠﮧ ﺍﻧﮭﯿﮟ ﺑﻨﯿﺎﺩﯼ ﺍﺧﻼﻗﯽ ﻗﺪﺭﻭﮞ ﭘﺮ ﺗﮭﺎ۔ ﮐﺘﺎﺏ ﮐﯽ ﺯﺩ ﮨﺮ ﺍﯾﺴﯽ ﻗﺪﺭ ﭘﺮ ﭘﮍﺗﯽ ﺗﮭﯽ ﺟﻮ ﻣﺬﮨﺐ ﺍﻭﺭ ﺍﺧﻼﻕ ﮐﻮ ﮨﻤﯿﺸﮧ ﻋﺰﯾﺰ ﺭﮨﮯ ﮨﯿﮟ۔ ﭘﺮﻭﭘﯿﮕﻨﮉﮮ ﮐﺎ ﮐﻤﺎﻝ ﺑﮭﯽ ﯾﮩﯽ ﮨﮯ ﮐﮧ ﺣﻤﻠﮧ ﺑﺮﺍﮦ ﺭﺍﺳﺖ ﻧﮧ ﮨﻮ، ﺑﻠﮑﮧ ﺍﻃﺮﺍﻑ ﻭ ﺟﻮﺍﻧﺐ ﺳﮯ ﮔﻮﻟﮧ ﺑﺎﺭﯼ ﮐﺮ ﮐﮯ ﻗﻠﻌﮧ ﮐﯽ ﺣﺎﻟﺖ ﮐﻮ ﺍﺗﻨﺎ ﻣﺨﺪﻭﺵ ﺑﻨﺎ ﺩﯾﺎ ﺟﺎﺋﮯ ﮐﮧ ﺧﻮﺩ ﺩﻓﺎﻉ ﮐﺮﻧﮯ ﻭﺍﻟﻮﮞ ﻣﯿﮟ ﺗﺰﻟﺰﻝ ﻭ ﺗﺬﺑﺬﺏ ﭘﯿﺪﺍ ﮨﻮ ﺟﺎﺋﮯ ﺍﻭﺭ ﻗﺪﻡ ﺍﺯ ﺧﻮﺩ ﺍﮐﮭﮍ ﺟﺎﻧﮯ ﭘﺮ ﺁﻣﺎﺩﮦ ﮨﻮ ﺟﺎﺋﯿﮟ۔ “ ‏( ﺹ ۲۳۴ ﺗﺎ ۲۳۶ ‏)
” ﺍﺳﻼﻡ ﺍﻭﺭ ﺍﯾﻤﺎﻥ ﺳﮯ ﺑﺮﮔﺸﺘﮧ ﮐﺮﻧﮯ ﺍﻭﺭ ﺻﺎﻑ ﻭﺻﺮﯾﺢ ﺍﺭﺗﺪﺍﺩ ﮐﯽ ﻃﺮﻑ ﻻﻧﮯ ﻣﯿﮟ ﻣﻠﺤﺪﻭﮞ ﺍﻭﺭ ﻧﯿﻢ ﻣﻠﺤﺪﻭﮞ ﮐﯽ ﺗﺤﺮﯾﺮﯾﮟ ﮨﺮﮔﺰ ﺍﺱ ﺩﺭﺟﮧ ﻣﻮﺛﺮ ﻧﮩﯿﮟ ﮨﻮﺋﯿﮟ ﺟﺘﻨﯽ ﻭﮦ ﻓﻨﯽ ﮐﺘﺎﺑﯿﮟ ﺛﺎﺑﺖ ﮨﻮﺋﯿﮟ ﺟﻮ ﻧﻔﺴﯿﺎﺕ ﮐﮯ ﻣﻮﺿﻮﻉ ﭘﺮ ﺍﮨﻞ ﻓﻦ ﮐﮯ ﻗﻠﻢ ﺳﮯ ﻧﮑﻠﯽ ﮨﻮﺋﯽ ﺗﮭﯿﮟ۔ ﺑﻈﺎﮨﺮ ﻣﺬﮨﺐ ﺳﮯ ﮐﻮﺋﯽ ﺗﻌﻠﻖ ﮨﯽ ﻧﮩﯿﮟ ﺭﮐﮭﺘﯽ ﺗﮭﯿﮟ، ﻧﮧ ﻧﻔﯿﺎً ﻧﮧ ﺍﺛﺒﺎﺗﺎً۔ ﺍﺻﻠﯽ ﺯﮨﺮ ﺍﻧﮭﯿﮟ ﺑﻈﺎﮨﺮ ﺑﮯﺿﺮﺭ ﮐﺘﺎﺑﻮﮞ ﮐﮯ ﺍﻧﺪﺭ ﮐﮭﻼ ﮨﻮﺍ ﻣﻼ۔ ﻣﺜﻼً ﺍﯾﮏ ﺷﺨﺺ ﮔﺰﺭﺍ ﮨﮯ ﮈﺍﮐﭩﺮ ﻣﺎﮈﺳﻠﯽ ‏( Maudesley ‏) ۔ ﺍﺧﺘﻼﻝ ﺩﻣﺎﻏﯽ ﺍﻭﺭ ﺍﻣﺮﺍﺽ ﻧﻔﺴﯿﺎﺗﯽ ﮐﻮ ﺑﯿﺎﻥ ﮐﺮﺗﮯ ﮐﺮﺗﮯ ﯾﮏ ﺑﯿﮏ ﻭﮦ ﺑﺪﺑﺨﺖ ﻣﺜﺎﻝ ﻣﯿﮟ ﻭﺣﯽ ﻣﺤﻤﺪﯼ ﮐﻮ ﻟﮯ ﺁﯾﺎ ﺍﻭﺭ ﺍﺳﻢ ﻣﺒﺎﺭﮎ ﮐﯽ ﺻﺮﺍﺣﺖ ﮐﮯ ﺳﺎﺗﮫ ﻟﮑﮫ ﮔﯿﺎ ﮐﮧ ﻣﺼﺮﻭﻉ ﺷﺨﺺ ﮐﮯ ﻟﯿﮯ ﯾﮧ ﺑﺎﻟﮑﻞ ﻣﻤﮑﻦ ﮨﮯ ﮐﮧ ﻭﮦ ﺍﭘﻨﺎ ﮐﻮﺋﯽ ﺑﮍﺍ ﮐﺎﺭﻧﺎﻣﮧ ﺩﻧﯿﺎ ﮐﮯ ﻟﯿﮯ ﭼﮭﻮﮌ ﺟﺎﺋﮯ۔ “ ‏( ﺹ ۲۴۰ ‏)
ﻣﻮﻻﻧﺎ ﻧﮯ ﺍﻟﺤﺎﺩ ﺳﮯ ﻭﺍﭘﺴﯽ ﮐﮯ ﺫﮨﻨﯽ ﺳﻔﺮ ﮐﯽ ﺗﻔﺼﯿﻞ ﺑﯿﺎﻥ ﮐﺮﺗﮯ ﮨﻮﺋﮯ ﺑﺪﮪ ﻣﺖ، ﺗﮭﯿﻮ ﺳﻮﻓﯽ، ﮨﻨﺪﻭ ﻓﻠﺴﻔﮧ ﻭﺗﺼﻮﻑ ﺍﻭﺭ ﻣﺨﺘﻠﻒ ﮨﻨﺪﻭ ﻣﻔﮑﺮﯾﻦ ﮐﯽ ﺗﺤﺮﯾﺮﯾﮟ ﭘﮍﮬﻨﮯ ﮐﺎ ﺫﮐﺮ ﮐﯿﺎ ﮨﮯ ﺍﻭﺭ ﺍﺳﮯ ﺍﺳﻼﻡ ﮐﯽ ﻃﺮﻑ ﻭﺍﭘﺴﯽ ﮐﺎ ﭘﮩﻼ ﻣﺮﺣﻠﮧ ﻗﺮﺍﺭ ﺩﯾﺎﮨﮯ۔ ﻟﮑﮭﺘﮯ ﮨﯿﮟ :
” ﮈﯾﮍﮪ ﺩﻭ ﺳﺎﻝ ‏( ۱۹ﺀ، ۲۰ﺀ ‏) ﮐﮯ ﺍﺱ ﻣﺴﻠﺴﻞ ﻣﻄﺎﻟﻌﮧ ﮐﺎ ﺣﺎﺻﻞ ﯾﮧ ﻧﮑﻼ ﮐﮧ ﻓﺮﻧﮕﯽ ﺍﻭﺭ ﻣﺎﺩﯼ ﻓﻠﺴﻔﮧ ﮐﺎ ﺟﻮ ﺑﺖ ﺩﻝ ﻣﯿﮟ ﺑﯿﭩﮭﺎ ﮨﻮﺍ ﺗﮭﺎ، ﻭﮦ ﺷﮑﺴﺖ ﮨﻮﮔﯿﺎ ﺍﻭﺭ ﺫﮨﻦ ﮐﻮ ﯾﮧ ﺻﺎﻑ ﻧﻈﺮ ﺁﻧﮯ ﻟﮕﺎ ﮐﮧ ﺍﺳﺮﺍﺭ ﮐﺎﺋﻨﺎﺕ ﺳﮯ ﻣﺘﻌﻠﻖ ﺁﺧﺮﯼ ﺗﻮﺟﯿﮧ ﺍﻭﺭ ﻗﻄﻌﯽ ﺗﻌﺒﯿﺮ ﺍﻥ ﻓﺮﻧﮕﯽ ﻣﺎﺩﯾﯿﻦ ﮐﯽ ﻧﮩﯿﮟ، ﺑﻠﮑﮧ ﺩﻧﯿﺎ ﻣﯿﮟ ﺍﯾﮏ ﺳﮯ ﺍﯾﮏ ﺍﻋﻠﯽٰ ﻭ ﺩﻝ ﻧﺸﯿﻦ ﺗﻮﺟﯿﮩﯿﮟ ﺍﻭﺭ ﺗﻌﺒﯿﺮﯾﮟ ﺍﻭﺭ ﺑﮭﯽ ﻣﻮﺟﻮﺩ ﮨﯿﮟ۔ ﺍﺳﻼﻡ ﺳﮯ ﺍﻥ ﺗﻌﻠﯿﻤﺎﺕ ﮐﻮ ﺑﮭﯽ ﺧﺎﺻﺎ ﺑﻌﺪ ﺗﮭﺎ، ﻟﯿﮑﻦ ﺑﮩﺮﺣﺎﻝ ﺍﺏ ﻣﺴﺎﺋﻞ ﺣﯿﺎﺕ، ﺍﺳﺮﺍﺭ ﮐﺎﺋﻨﺎﺕ ﺳﮯ ﻣﺘﻌﻠﻖ ﻧﻈﺮ ﮐﮯ ﺳﺎﻣﻨﮯ ﺍﯾﮏ ﺑﺎﻟﮑﻞ ﻧﯿﺎ ﺭﺥ ﺁ ﮔﯿﺎ ﺍﻭﺭ ﻣﺎﺩﯾﺖ، ﻻ ﺍﺩﺭﯾﺖ ﻭ ﺗﺸﮑﯿﮏ ﮐﯽ ﺟﻮ ﺳﺮﺑﻔﻠﮏ ﻋﻤﺎﺭﺕ ﺑﺮﺳﻮﮞ ﻣﯿﮟ ﺗﻌﻤﯿﺮ ﮨﻮﺋﯽ ﺗﮭﯽ، ﻭﮦ ﺩﮬﮍﺍﻡ ﺳﮯ ﺯﻣﯿﻦ ﭘﺮ ﺁ ﺭﮨﯽ۔ ﺩﻝ ﺍﺏ ﺍﺱ ﻋﻘﯿﺪﮦ ﭘﺮ ﺁ ﮔﯿﺎ ﮐﮧ ﻣﺎﺩﯾﺖ ﮐﮯ ﻋﻼﻭﮦ ﺍﻭﺭ ﺍﺱ ﺳﮯ ﮐﮩﯿﮟ ﻣﺎﻭﺭﺍ ﻭ ﻣﺎﻓﻮﻕ ﺍﯾﮏ ﺩﻭﺳﺮﺍ ﻋﺎﻟﻢ ﺭﻭﺣﺎﻧﯿﺖ ﮐﺎ ﺑﮭﯽ ﮨﮯ۔ ﺣﻮﺍﺱ ﻣﺎﺩﯼ ﻣﺤﺴﻮﺳﺎﺕ، ﻣﺮﺋﯿﺎﺕ ﻭ ﻣﺸﮩﻮﺩﺍﺕ ﮨﯽ ﺳﺐ ﮐﭽﮫ ﻧﮩﯿﮟ، ﺍﻥ ﮐﯽ ﺗﮩﮧ ﻣﯿﮟ ﺍﻭﺭ ﺍﻥ ﺳﮯ ﺑﺎﻻﺗﺮ ” ﻏﯿﺐ “ ﺍﻭﺭ ﻣﻐﯿﺒﺎﺕ ﮐﺎ ﺑﮭﯽ ﺍﯾﮏ ﻣﺴﺘﻘﻞ ﻋﺎﻟﻢ ﺍﭘﻨﺎ ﻭﺟﻮﺩ ﺭﮐﮭﺘﺎ ﮨﮯ۔ ﻗﺮﺁﻥ ﻣﺠﯿﺪ ﻧﮯ ﺑﺎﻟﮑﻞ ﺷﺮﻭﻉ ﻣﯿﮟ ﺟﻮ ﺍﯾﻤﺎﻥ ﮐﺎ ﻭﺻﻒ ﺍﯾﻤﺎﻥ ﺑﺎﻟﻐﯿﺐ ﺑﺘﺎ ﺩﯾﺎ ﮨﮯ، ﻭﮦ ﺑﮩﺖ ﮨﯽ ﭘﺮﺣﮑﻤﺖ ﻭﻣﻌﻨﯽ ﺧﯿﺰ ﮨﮯ۔ ﭘﮩﻠﮯ ﻧﻔﺲ ” ﻏﯿﺐ “ ﭘﺮ ﺗﻮ ﺍﯾﻤﺎﻥ ﮨﻮ، ﭘﮭﺮ ﺍﺱ ﮐﮯ ﺟﺰﺋﯿﺎﺕ ﻭﺗﻔﺼﯿﻼﺕ ﺑﮭﯽ ﻣﻌﻠﻮﻡ ﮨﻮﺗﮯ ﺭﮨﯿﮟ ﮔﮯ۔ ﮨﻤﺎﺭﮮ ﻣﻮﻟﻮﯼ ﺻﺎﺣﺒﺎﻥ ﮐﻮ ﺍﺱ ﻣﻨﺰﻝ ﻭ ﻣﻘﺎﻡ ﮐﯽ ﮐﻮﺋﯽ ﻗﺪﺭ ﻧﮧ ﮨﻮ، ﻟﯿﮑﻦ ﺩﺭﺣﻘﯿﻘﺖ ﯾﮧ ﺭﻭﺣﺎﻧﯿﺖ ﮐﺎ ﺍﻋﺘﻘﺎﺩ، ﺍﯾﻤﺎﻥ ﮐﯽ ﭘﮩﻠﯽ ﺍﻭﺭ ﺑﮍﯼ ﻓﺘﺢ ﻣﺒﯿﻦ ﻣﺎﺩﯾﺖ، ﺍﻟﺤﺎﺩ ﻭﺗﺸﮑﯿﮏ ﮐﮯ ﻟﺸﮑﺮ ﭘﺮ ﺗﮭﯽ۔ “ ‏( ﺹ ۲۴۷، ۲۴۸ ‏)
” ﺍﺳﯽ ﺩﻭﺭ ﮐﯽ ﺍﺑﮭﯽ ﺍﺑﺘﺪﺍ ﮨﯽ ﺗﮭﯽ ﮐﮧ ﻣﻮﻻﻧﺎ ﺷﺒﻠﯽ ﮐﯽ ﺳﯿﺮۃ ﺍﻟﻨﺒﯽ ﮐﯽ ﺟﻠﺪ ﺍﻭﻝ ﭘﺮﯾﺲ ﺳﮯ ﺑﺎﮨﺮ ﺁ ﮔﺌﯽ۔ ﮐﺘﺎﺏ ﺷﺒﻠﯽ ﮐﮯ ﻗﻠﻢ ﺳﮯ ﺗﮭﯽ۔ ﻣﻮﺿﻮﻉ ﮐﭽﮫ ﺑﮭﯽ ﺳﮩﯽ، ﮐﯿﺴﮯ ﻧﮧ ﺍﺱ ﮐﻮ ﺷﻮﻕ ﺳﮯ ﮨﺎﺗﮭﻮﮞ ﺳﮯ ﮐﮭﻮﻟﺘﺎ ﺍﻭﺭ ﺍﺷﺘﯿﺎﻕ ﮐﯽ ﺁﻧﮑﮭﻮﮞ ﺳﮯ ﭘﮍﮬﺘﺎ۔ ﮐﮭﻮﻟﯽ ﺍﻭﺭ ﺟﺐ ﺗﮏ ﺍﻭﻝ ﺳﮯ ﺁﺧﺮ ﺗﮏ ﭘﮍﮪ ﻧﮧ ﻟﯽ، ﺩﻡ ﻧﮧ ﻟﯿﺎ۔ ﺩﻝ ﮐﺎ ﺍﺻﻠﯽ ﭼﻮﺭ ﺗﻮ ﯾﮩﯿﮟ ﺗﮭﺎ ﺍﻭﺭ ﻧﻔﺲ ﺷﻮﻡ ﮐﻮ ﺳﺐ ﺳﮯ ﺑﮍﯼ ﭨﮭﻮﮐﺮ ﺟﻮ ﻟﮕﯽ ﺗﮭﯽ، ﻭﮦ ﺍﺳﯽ ﺳﯿﺮۃ ﺍﻗﺪﺱ ﮨﯽ ﮐﮯ ﻣﺘﻌﻠﻖ ﺗﻮ ﺗﮭﯽ۔ ﻣﺴﺘﺸﺮﻗﯿﻦ ﻭ ﻣﺤﻘﻘﯿﻦ ﻓﺮﻧﮓ ﮐﮯ ﺣﻤﻠﻮﮞ ﮐﺎ ﺍﺻﻞ ﮨﺪﻑ ﺗﻮ ﺫﺍﺕ ﺭﺳﺎﻟﺖ ﮨﯽ ﺗﮭﯽ۔ ﺧﺼﻮﺻﺎً ﺑﺴﻠﺴﻠﮧ ﻏﺰﻭﺍﺕ ﻭ ﻣﺤﺎﺭﺑﺎﺕ، ﻇﺎﻟﻤﻮﮞ ﻧﮯ ﺑﮭﯽ ﺗﻮ ﻃﺮﺡ ﻃﺮﺡ ﺳﮯ ﺩﻝ ﻣﯿﮟ ﺑﭩﮭﺎ ﺩﯾﺎ ﺗﮭﺎ ﮐﮧ ﺫﺍﺕ ﻣﺒﺎﺭﮎ ﻧﻌﻮﺫ ﺑﺎﻟﻠﮧ ﺑﺎﻟﮑﻞ ﺍﯾﮏ ﻇﺎﻟﻢ ﻓﺎﺗﺢ ﮐﯽ ﺗﮭﯽ۔ ﺷﺒﻠﯽ ﻧﮯ ‏( ﺍﻟﻠﮧ ﺍﻥ ﮐﯽ ﺗﺮﺑﺖ ﭨﮭﻨﮉﯼ ﺭﮐﮭﮯ ‏) ﺍﺻﻞ ﺩﻭﺍ ﺍﺳﯽ ﺩﺭﺩ ﮐﯽ ﮐﯽ، ﻣﺮﮨﻢ ﺍﺳﯽ ﺯﺧﻢ ﭘﺮ ﺭﮐﮭﺎ۔ ﺍﻭﺭ ﮐﺘﺎﺏ ﺟﺐ ﺑﻨﺪ ﮐﯽ ﺗﻮ ﭼﺸﻢ ﺗﺼﻮﺭ ﮐﮯ ﺳﺎﻣﻨﮯ ﺭﺳﻮﻝ ﻋﺮﺑﯽ ﮐﯽ ﺗﺼﻮﯾﺮ ﺍﯾﮏ ﺑﮍﮮ ﻣﺼﻠﺢ ﻣﻠﮏ ﻭﻗﻮﻡ ﺍﻭﺭ ﺍﯾﮏ ﺭﺣﻢ ﺩﻝ ﻭ ﻓﯿﺎﺽ ﺣﺎﮐﻢ ﮐﯽ ﺗﮭﯽ ﺟﺲ ﮐﻮ ﺍﮔﺮ ﺟﺪﺍﻝ ﻭ ﻗﺘﺎﻝ ﺳﮯ ﮐﺎﻡ ﻟﯿﻨﺎ ﭘﮍﺍ ﺗﮭﺎ ﺗﻮ ﭘﮭﺮ ﺑﺎﻟﮑﻞ ﺁﺧﺮ ﺩﺭﺟﮧ ﻣﯿﮟ، ﮨﺮ ﻃﺮﺡ ﭘﺮ ﻣﺠﺒﻮﺭ ﮨﻮ ﮐﺮ۔ ﯾﮧ ﻣﺮﺗﺒﮧ ﯾﻘﯿﻨﺎ ﺁﺝ ﮨﺮ ﻣﺴﻠﻤﺎﻥ ﮐﻮ ﺭﺳﻮﻝ ﻭ ﻧﺒﯽ ﮐﮯ ﺩﺭﺟﮧ ﺳﮯ ﮐﮩﯿﮟ ﻓﺮﻭﺗﺮ ﻧﻈﺮ ﺁﺋﮯ ﮔﺎ ﺍﻭﺭ ﺷﺒﻠﯽ ﮐﯽ ﮐﻮﺋﯽ ﻗﺪﺭ ﻭ ﻗﯿﻤﺖ ﻧﻈﺮ ﻣﯿﮟ ﻧﮧ ﺁﺋﮯ ﮔﯽ، ﻟﯿﮑﻦ ﺍﺱ ﮐﺎ ﺣﺎﻝ ﺫﺭﺍ ﺍ ﺱ ﮐﮯ ﺩﻝ ﺳﮯ ﭘﻮﭼﮭﯿﮯ ﺟﺲ ﮐﮯ ﺩﻝ ﻣﯿﮟ ﻧﻌﻮﺫ ﺑﺎﻟﻠﮧ ﭘﻮﺭﺍ ﺑﻐﺾ ﻭ ﻋﻨﺎﺩ ﺍﺱ ﺫﺍﺕ ﺍﻗﺪﺱ ﮐﯽ ﻃﺮﻑ ﺳﮯ ﺟﻤﺎ ﮨﻮﺍ ﺗﮭﺎ۔ ﺷﺒﻠﯽ ﮐﯽ ﮐﺘﺎﺏ ﮐﺎ ﯾﮧ ﺍﺣﺴﺎﻥ ﻣﯿﮟ ﮐﺒﮭﯽ ﺑﮭﻮﻟﻨﮯ ﻭﺍﻻ ﻧﮩﯿﮟ۔ “ ‏( ﺹ ۲۴۸ ‏)
” ﮨﻨﺪﻭ ﻓﻠﺴﻔﮧ ﺍﻭﺭ ﺟﻮﮔﯿﺎﻧﮧ ﺗﺼﻮﻑ ﻧﮯ ﮔﻮﯾﺎ ﮐﻔﺮ ﻭ ﺍﯾﻤﺎﻥ ﮐﮯ ﺩﺭﻣﯿﺎﻥ ﭘﻞ ﮐﺎ ﮐﺎﻡ ﺩﯾﺎ۔ ﺍﺱ ﻣﻌﺮﻭﺿﮧ ﮐﻮ ﻭﮦ ﻣﺘﻘﺸﻒ ﺣﻀﺮﺍﺕ ﺧﺎﺹ ﻃﻮﺭ ﭘﺮ ﻧﻮﭦ ﮐﺮ ﻟﯿﮟ ﺟﻮ ﮨﻨﺪﻭ ﻓﻠﺴﻔﮧ ﮐﮯ ﻧﺎﻡ ﮨﯽ ﺳﮯ ﺑﮭﮍﮐﺘﮯ ﮨﯿﮟ ﺍﻭﺭ ﺍﺳﮯ ﯾﮑﺴﺮ ﮐﻔﺮ ﻭ ﺿﻼﻟﺖ ﮐﮯ ﻣﺮﺍﺩﻑ ﻗﺮﺍﺭ ﺩﯾﮯ ﮨﻮﺋﮯ ﮨﯿﮟ۔ ﮨﺪﺍﯾﺖ ﮐﺎ ﺫﺭﯾﻌﮧ ﺑﮭﯽ ﺍﺳﮯ ﺑﺂﺳﺎﻧﯽ ﺑﻨﺎﯾﺎ ﺟﺎ ﺳﮑﺘﺎ ﮨﮯ۔ ﺍﻭﺭ ﯾﮧ ﺣﻀﺮﺍﺕ ﺍﭘﻨﮯ ﺟﻮﺵ ﺩﯾﻦ ﺩﺍﺭﯼ ﻣﯿﮟ ﺷﺒﻠﯽ ﺍﻭﺭ ﻣﺤﻤﺪ ﻋﻠﯽ ﻻﮨﻮﺭﯼ ﮐﯽ ﺧﺪﻣﺖ ﺗﺒﻠﯿﻎ ﮐﻮ ﺳﺮﮮ ﺳﮯ ﻧﻈﺮ ﺍﻧﺪﺍﺯ ﻧﮧ ﮐﺮ ﺟﺎﺋﯿﮟ، ﻣﯿﮟ ﻧﮯ ﺗﻮ ﺩﻭﻧﻮﮞ ﮐﯽ ﺩﺳﺖ ﮔﯿﺮﯼ ﻣﺤﺴﻮﺱ ﮐﯽ ﺑﻠﮑﮧ ﺍﺳﭙﺮﭦ ﺁﻑ ﺍﺳﻼﻡ ﻭﺍﻟﮯ ﺟﺴﭩﺲ ﺍﻣﯿﺮ ﻋﻠﯽ ﮐﮯ ﮐﺎﻡ ﮐﻮ ﺑﮭﯽ ﺣﻘﯿﺮ ﻧﮧ ﺳﻤﺠﮭﯿﮟ ﺣﺎﻻﮞ ﮐﮧ ﻭﮦ ﺑﮯﭼﺎﺭﮮ ﺗﻮ ﻗﺮﺁﻥ ﻣﺠﯿﺪ ﮐﻮ ﺷﺎﯾﺪ ﮐﻼﻡ ﻣﺤﻤﺪ ﮨﯽ ﺳﻤﺠﮭﺘﮯ ﺗﮭﮯ۔ ﺍﭘﻨﯽ ﺳﺮﮔﺰﺷﺖ ﮐﺎ ﺗﻮ ﺧﻼﺻﮧ ﯾﮩﯽ ﮨﮯ ﮐﮧ ﺟﺲ ﻓﮑﺮﯼ ﻣﻨﺰﻝ ﻣﯿﮟ، ﻣﯿﮟ ﺍﺱ ﻭﻗﺖ ﺗﮭﺎ، ﺣﻀﺮﺕ ﺗﮭﺎﻧﻮﯼ ﺟﯿﺴﮯ ﺑﺰﺭﮔﻮﮞ ﮐﯽ ﺗﺤﺮﯾﺮﻭﮞ ﮐﻮ ﻧﺎﻗﺎﺑﻞ ﺍﻟﺘﻔﺎﺕ ﭨﮭﮩﺮﺍﺗﺎ، ﺍﻥ ﮐﯽ ﻃﺮﻑ ﻧﻈﺮ ﺗﮏ ﻧﮧ ﺍﭨﮭﺎﺗﺎ ﺍﻭﺭ ﺍﻥ ﮐﮯ ﻭﻋﻆ ﻭﺗﻠﻘﯿﻦ ﺳﮯ ﺍﻟﭩﺎ ﮨﯽ ﺍﺛﺮ ﻗﺒﻮﻝ ﮐﺮﺗﺎ۔ ﻏﺬﺍ ﻟﻄﯿﻒ ﻭﺗﻘﻮﯾﺖ ﺑﺨﺶ ﮨﯽ ﺳﮩﯽ، ﻟﯿﮑﻦ ﺍﮔﺮ ﻣﺮﯾﺾ ﮐﮯ ﻣﻌﺪﮦ ﺳﮯ ﻣﻨﺎﺳﺒﺖ ﻧﮩﯿﮟ ﮨﻮﮔﯽ ﺗﻮ ﺍﻟﭩﯽ ﻣﻀﺮ ﮨﯽ ﭘﮍﮮ ﮔﯽ۔ “ ‏( ﺹ ۲۵۵، ۲۵۶ ‏)
” ﺑﮍﯼ ﺧﯿﺮ ﯾﮧ ﮨﻮﺋﯽ ﮐﮧ ﻣﺠﻠﺴﯽ، ﺧﺎﻧﮕﯽ ﺗﻌﻠﻘﺎﺕ ﺍﭘﻨﮯ ﻋﺰﯾﺰﻭﮞ ﺍﻭﺭ ﺧﺎﻧﺪﺍﻥ ﻭﺍﻟﻮﮞ ﺳﮯ ﺑﺪﺳﺘﻮﺭ ﺑﺎﻗﯽ ﺭﮨﮯ۔ ﺍﭘﻨﮯ ﺍﯾﮏ ﺳﺎﺗﮭﯽ ﮐﻮ ﺍﺳﯽ ﺯﻣﺎﻧﮧ ﻣﯿﮟ ﺩﯾﮑﮭﺎ ﮐﮧ ﺍﭘﻨﻮﮞ ﺳﮯ ﮐﭧ ﮐﺮ ﻣﮑﻤﻞ ﻏﯿﺮﻭﮞ ﻣﯿﮟ ﺷﺎﻣﻞ ﮨﻮﮔﺌﮯ ﺗﮭﮯ ﺍﻭﺭ ﺭﮨﻦ ﺳﮩﻦ ﺗﮏ ﺑﺎﻟﮑﻞ ﮨﻨﺪﻭﺍﻧﮧ ﮐﺮ ﻟﯿﺎ ﺗﮭﺎ۔ ﻣﯿﮟ ﺍﭘﻨﮯ ﮐﮭﺎﻧﮯ ﭘﯿﻨﮯ، ﻭﺿﻊ ﻭ ﻟﺒﺎﺱ ﺍﻭﺭ ﻋﺎﻡ ﻣﻌﺎﺷﺮﺕ ﻣﯿﮟ، ﺑﻠﮑﮧ ﮐﮩﻨﺎ ﭼﺎﮨﯿﮯ ﮐﮧ ﺍﯾﮏ ﺣﺪ ﺗﮏ ﺟﺬﺑﺎﺗﯽ ﺣﯿﺜﯿﺖ ﺳﮯ ﺑﮭﯽ ﻣﺴﻠﻤﺎﻥ ﮨﯽ ﺭﮨﺎ، ﺍﻟﺒﺘﮧ ﺍﯾﮏ ﺭﻭﺷﻦ ﺧﯿﺎﻝ ﻣﺴﻠﻤﺎﻥ۔ ﺍﻭﺭ ﺭﻭﺷﻦ ﺧﯿﺎﻝ ﻣﺴﻠﻤﺎﻥ ﺍﺱ ﻭﻗﺖ ﻧﻮﺟﻮﺍﻧﻮﮞ ﻣﯿﮟ ﮐﻮﻥ ﻧﮧ ﺗﮭﺎ؟ ﺍﻭﺭ ﻣﺴﻠﻢ ﻗﻮﻣﯿﺖ ﺳﮯ ﻣﯿﺮﯼ ﯾﮕﺎﻧﮕﺖ ﮐﯽ ﺟﮍﯾﮟ ﺑﺤﻤﺪﺍﻟﻠﮧ ﮐﭩﻨﮯ ﻧﮧ ﭘﺎﺋﯿﮟ۔ ﻣﺴﻠﻢ ﻗﻮﻣﯿﺖ ﮐﯽ ﻧﻌﻤﺖ ﺑﮭﯽ، ﺩﯾﻦ ﺍﺳﻼﻡ ﮐﮯ ﺑﻌﺪ، ﺍﯾﮏ ﺑﮍﯼ ﻧﻌﻤﺖ ﮨﮯ ﺍﻭﺭ ﮐﻮﺋﯽ ﺻﺎﺣﺐ ﺍﺳﮯ ﺑﮯ ﻭﻗﻌﺖ ﻭ ﺑﮯ ﻗﯿﻤﺖ ﻧﮧ ﺳﻤﺠﮭﯿﮟ۔ ﻣﺠﮭﮯ ﺁﮔﮯ ﭼﻞ ﮐﺮ ﺍﺱ ﺑﭽﯽ ﮐﮭﭽﯽ ﻧﻌﻤﺖ ﮐﯽ ﺑﮭﯽ ﺑﮍﯼ ﻗﺪﺭ ﻣﻌﻠﻮﻡ ﮨﻮﺋﯽ۔ “ ‏( ﺹ ۲۴۲ ‏)
” ﺍﮐﺘﻮﺑﺮ ۲۰ﺀ ﻣﯿﮟ ﺳﻔﺮ ﺩﮐﻦ ﻣﯿﮟ ﺍﯾﮏ ﻋﺰﯾﺰ ﻧﺎﻇﺮ ﯾﺎﺭ ﺟﻨﮓ ﺟﺞ ﮐﮯ ﮨﺎﮞ ﺍﻭﺭﻧﮓ ﺁﺑﺎﺩ ﻣﯿﮟ ﻗﯿﺎﻡ ﮐﺎ ﺍﺗﻔﺎﻕ ﮨﻮﺍ ﺍﻭﺭ ﺍﻥ ﮐﮯ ﺍﻧﮕﺮﯾﺰﯼ ﮐﺘﺐ ﺧﺎﻧﮧ ﻣﯿﮟ ﻧﻈﺮ ﻣﺤﻤﺪ ﻋﻠﯽ ﻻﮨﻮﺭﯼ ﺍﺣﻤﺪﯼ ‏( ﻋﺮﻑ ﻋﺎﻡ ﻣﯿﮟ ﻗﺎﺩﯾﺎﻧﯽ ‏) ﮐﮯ ﺍﻧﮕﺮﯾﺰﯼ ﺗﺮﺟﻤﮧ ﻭ ﺗﻔﺴﯿﺮ ﻗﺮﺁﻥ ﻣﺠﯿﺪ ﭘﺮ ﭘﮍ ﮔﺌﯽ۔ ﺑﮯﺗﺎﺏ ﮨﻮ ﮐﺮ ﺍﻟﻤﺎﺭﯼ ﺳﮯ ﻧﮑﺎﻻ ﺍﻭﺭ ﭘﮍﮬﻨﺎ ﺷﺮﻭﻉ ﮐﺮ ﺩﯾﺎ۔ ﺟﻮﮞ ﺟﻮﮞ ﭘﮍﮬﺘﺎ ﮔﯿﺎ، ﺍﻟﺤﻤﺪﻟﻠﮧ ﺍﯾﻤﺎﻥ ﺑﮍﮬﺘﺎ ﮔﯿﺎ۔ ﺟﺲ ” ﺻﺎﺣﺒﺎﻧﮧ “ ﺫﮨﻨﯿﺖ ﻣﯿﮟ ﺍﺱ ﻭﻗﺖ ﺗﮏ ﺗﮭﺎ، ﺍﺱ ﮐﺎ ﻋﯿﻦ ﻣﻘﺘﻀﺎ ﯾﮧ ﺗﮭﺎ ﮐﮧ ﺟﻮ ﻣﻄﺎﻟﺐ ﺍﺭﺩﻭ ﻣﯿﮟ ﺑﮯﺍﺛﺮ ﺭﮨﺘﮯ ﺍﻭﺭ ﺳﭙﺎﭦ ﻣﻌﻠﻮﻡ ﮨﻮﺗﮯ، ﻭﮨﯽ ﺍﻧﮕﺮﯾﺰﯼ ﮐﮯ ﻗﺎﻟﺐ ﻣﯿﮟ ﺟﺎ ﮐﺮ ﻣﺆﺛﺮ ﻭ ﺟﺎﻧﺪﺍﺭ ﺑﻦ ﺟﺎﺗﮯ۔ ﯾﮧ ﮐﻮﺋﯽ ﻣﻐﺎﻟﻄﮧ ﻧﻔﺲ ﮨﻮ ﯾﺎ ﻧﮧ ﮨﻮ، ﺑﮩﺮﺣﺎﻝ ﻣﯿﺮﮮ ﺣﻖ ﻣﯿﮟ ﺗﻮ ﺣﻘﯿﻘﺖ ﻭﺍﻗﻌﮧ ﺑﻦ ﮐﺮ ﺭﮨﺎ۔ ﺍﻭﺭ ﺍﺱ ﺍﻧﮕﺮﯾﺰﯼ ﻗﺮﺁﻥ ﮐﻮ ﺟﺐ ﺧﺘﻢ ﮐﺮ ﮐﮯ ﺩﻝ ﮐﻮ ﭨﭩﻮﻻ ﺗﻮ ﺍﭘﻨﮯ ﮐﻮ ﻣﺴﻠﻤﺎﻥ ﮨﯽ ﭘﺎﯾﺎ ﺍﻭﺭ ﺍﺏ ﺍﭘﻨﮯ ﺿﻤﯿﺮ ﮐﻮ ﺩﮬﻮﮐﺎ ﺩﯾﮯ ﺑﻐﯿﺮ ﮐﻠﻤﮧ ﺷﮩﺎﺩﺕ ﺑﻼ ﺗﺎﻣﻞ ﭘﮍﮪ ﭼﮑﺎ ﺗﮭﺎ۔ ﺍﻟﻠﮧ ﺍﺱ ﻣﺤﻤﺪ ﻋﻠﯽ ﮐﻮ ﮐﺮﻭﭦ ﮐﺮﻭﭦ ﺟﻨﺖ ﻧﺼﯿﺐ ﮐﺮﮮ۔ ﺍﺱ ﮐﺎ ﻋﻘﯿﺪﮦ ﻣﺮﺯﺍ ﺻﺎﺣﺐ ﮐﮯ ﻣﺘﻌﻠﻖ ﻏﻠﻂ ﺗﮭﺎ ﯾﺎ ﺻﺤﯿﺢ، ﻣﺠﮭﮯ ﺍﺱ ﺳﮯ ﻣﻄﻠﻖ ﺑﺤﺚ ﻧﮩﯿﮟ۔ ﺑﮩﺮﺣﺎﻝ ﺍﭘﻨﮯ ﺫﺍﺗﯽ ﺗﺠﺮﺑﮧ ﮐﻮ ﮐﯿﺎ ﮐﺮﻭﮞ، ﻣﯿﺮﮮ ﮐﻔﺮ ﻭ ﺍﺭﺗﺪﺍﺩ ﮐﮯ ﺗﺎﺑﻮﺕ ﭘﺮ ﺗﻮ ﺁﺧﺮﯼ ﮐﯿﻞ ﺍﺳﯽ ﻧﮯ ﭨﮭﻮﻧﮑﯽ۔ “ ‏( ﺹ ۲۵۴، ۲۵۵ ‏)
ﺍﭘﻨﯽ ﺍﺻﻼﺡ ﮐﮯ ﺿﻤﻦ ﻣﯿﮟ ﻣﺨﺘﻠﻒ ﺣﻀﺮﺍﺕ ﮐﯽ ﮐﻮﺷﺸﻮﮞ ﺍﻭﺭ ﺍﻥ ﮐﮯ ﺭﺍﺋﯿﮕﺎﮞ ﺟﺎﻧﮯ ﮐﺎ ﺫﮐﺮ ﮐﺮﺗﮯ ﮨﻮﺋﮯ ﻟﮑﮭﺘﮯ ﮨﯿﮟ :
” ﮨﺎﮞ، ﻣﺨﻠﺼﺎﻧﮧ ﻭ ﺣﮑﯿﻤﺎﻧﮧ ﮐﻮﺷﺸﯿﮟ ﭘﮭﺮ ﺍﮔﺮ ﺗﮭﻮﮌﯼ ﺑﮩﺖ ﮐﺴﯽ ﮐﯽ ﭼﭙﮑﮯ ﭼﭙﮑﮯ ﮐﺎﺭﮔﺮ ﮨﻮﺗﯽ ﺭﮨﯿﮟ ﺗﻮ ﺑﺲ ﺍﻥ ﺩﻭ ﮨﺴﺘﯿﻮﮞ ﮐﯽ :
1 ۔ﺍﯾﮏ ﺍﻟﮧ ﺁﺑﺎﺩ ﮐﮯ ﻧﺎﻣﻮﺭ ﻇﺮﯾﻒ ﺷﺎﻋﺮ ﺣﻀﺮﺕ ﺍﮐﺒﺮؒ۔ ﺑﺤﺚ ﻭ ﻣﻨﺎﻇﺮﮦ ﮐﯽ ﺍﻧﮭﻮﮞ ﻧﮯ ﮐﺒﮭﯽ ﭼﮭﺎﺅﮞ ﺑﮭﯽ ﻧﮩﯿﮟ ﭘﮍﻧﮯ ﺩﯼ ﺍﻭﺭ ﻧﮧ ﮐﺒﮭﯽ ﭘﻨﺪ ﻭ ﻣﻮﻋﻈﺖ ﮨﯽ ﮐﯽ ﻃﺮﺡ ﮈﺍﻟﯽ۔ ﺑﺲ ﻣﻮﻗﻊ ﺑﮧ ﻣﻮﻗﻊ ﺍﭘﻨﮯ ﻣﯿﭩﮭﮯ ﺍﻧﺪﺍﺯ ﻣﯿﮟ ﮐﻮﺋﯽ ﺑﺎﺕ ﭼﭙﮑﮯ ﺳﮯ ﺍﯾﺴﯽ ﮐﮩﮧ ﮔﺰﺭﺗﮯ ﺟﻮ ﺩﻝ ﻣﯿﮟ ﺍﺗﺮ ﺟﺎﺗﯽ ﺍﻭﺭ ﺫﮨﻦ ﮐﻮ ﺟﯿﺴﮯ ﭨﮩﻮﮐﮯ ﺩﮮ ﺩﯾﺘﮯ ﮐﮧ ﻗﺒﻮﻝ ﺣﻖ ﮐﯽ ﮔﻨﺠﺎﺋﺶ ﮐﭽﮫ ﺗﻮ ﺑﮩﺮﺣﺎﻝ ﭘﯿﺪﺍ ﮨﻮ ﮐﺮ ﺭﮨﺘﯽ۔
2 ۔ﺩﻭﺳﺮﯼ ﮨﺴﺘﯽ ﻭﻗﺖ ﮐﮯ ﻧﺎﻣﻮﺭ ﺭﮦ ﻧﻤﺎﺋﮯ ﻣﻠﮏ ﻭ ﻣﻠﺖ ﻣﻮﻻﻧﺎ ﻣﺤﻤﺪ ﻋﻠﯽؒ ﮐﯽ ﺗﮭﯽ۔ ﺑﮍﯼ ﺯﻭﺭﺩﺍﺭ ﺷﺨﺼﯿﺖ ﺍﻥ ﮐﯽ ﺗﮭﯽ ﺍﻭﺭ ﻣﯿﺮﮮ ﺗﻮ ﮔﻮﯾﺎ ﻣﺤﺒﻮﺏ ﮨﯽ ﺗﮭﮯ۔ ﮐﺒﮭﯽ ﺧﻂ ﻣﯿﮟ ﺍﻭﺭ ﮐﺒﮭﯽ ﺯﺑﺎﻧﯽ، ﺟﮩﺎﮞ ﺫﺭﺍ ﺑﮭﯽ ﻣﻮﻗﻊ ﭘﺎﺗﮯ، ﺍﺑﻞ ﭘﮍﺗﮯ ﺍﻭﺭ ﺟﻮﺵ ﻭ ﺧﺮﻭﺵ ﮐﮯ ﺳﺎﺗﮫ، ﮐﺒﮭﯽ ﮨﻨﺴﺘﮯ ﮨﻮﺋﮯ، ﮐﺒﮭﯽ ﮔﺮﺟﺘﮯ ﮨﻮﺋﮯ ﺍﻭﺭ ﮐﺒﮭﯽ ﺁﻧﺴﻮ ﺑﮩﺎﺗﮯ ﮨﻮﺋﮯ ﺗﺒﻠﯿﻎ ﮐﺮ ﮈﺍﻟﺘﮯ۔ ﺍﻥ ﮐﯽ ﻋﺎﻟﯽ ﺩﻣﺎﻏﯽ، ﺫﮨﺎﻧﺖ، ﻋﻠﻢ، ﺍﺧﻼﺹ ﮐﺎ ﭘﻮﺭﯼ ﻃﺮﺡ ﻗﺎﺋﻞ ﺗﮭﺎ، ﺍﺱ ﻟﯿﮯ ﮐﺒﮭﯽ ﺑﮭﯽ ﮐﻮﺋﯽ ﮔﺮﺍﻧﯽ ﺩﻭﻧﻮﮞ ﮐﯽ ﺗﺒﻠﯿﻎ ﺳﮯ ﻧﮧ ﮨﻮﺋﯽ ﺍﻭﺭ ﺩﻭﻧﻮﮞ ﺣﻖ ﻧﺼﺢ ‏( ﺧﯿﺮ ﺧﻮﺍﮨﯽ ‏) ﺍﺩﺍ ﮐﺮ ﮐﮯ ﭘﻮﺭﺍ ﺍﺟﺮ ﺳﻤﯿﭩﺘﮯ ﺭﮨﮯ۔ “ ‏( ﺹ ۲۴۹، ۲۵۰ ‏)
” ﮔﯿﺘﺎ ﮐﮯ ﻣﻄﺎﻟﻌﮧ ﮐﮯ ﺑﻌﺪ ﺳﮯ ﻃﺒﯿﻌﺖ ﻣﯿﮟ ﺭﺟﺤﺎﻥ ﺗﺼﻮﻑ ﮐﯽ ﺟﺎﻧﺐ ﭘﯿﺪﺍ ﮨﻮ ﮔﯿﺎ ﺗﮭﺎ ﺍﻭﺭ ﻣﺴﻠﻢ ﺻﻮﻓﯿﺎ ﮐﯽ ﮐﺮﺍﻣﺘﻮﮞ ﺍﻭﺭ ﻣﻠﻔﻮﻇﺎﺕ ﺳﮯ ﺍﺏ ﻭﺣﺸﺖ ﻧﮩﯿﮟ ﺭﮨﯽ ﺗﮭﯽ، ﺩﻟﭽﺴﭙﯽ ﭘﯿﺪﺍ ﮨﻮﮔﺌﯽ ﺗﮭﯽ ﺍﻭﺭ ﺧﺎﺻﯽ ﮐﺘﺎﺑﯿﮟ ﻓﺎﺭﺳﯽ ﺍﻭﺭ ﺍﺭﺩﻭ ﮐﯽ ﺩﯾﮑﮫ ﺑﮭﯽ ﮈﺍﻟﯽ ﺗﮭﯿﮟ۔ ۱۹۱۹ﺀ ﮐﺎ ﺁﺧﺮ ﺗﮭﺎ ﮐﮧ ﺍﭘﻨﮯ ﺍﯾﮏ ﻋﺰﯾﺰ ﺳﯿﺪ ﻣﻤﺘﺎﺯ ﺍﺣﻤﺪ ﺑﺎﻧﺴﻮﯼ ﻟﮑﮭﻨﻮﯼ ﮐﮯ ﭘﺎﺱ ﻣﺜﻨﻮﯼ ﺭﻭﻣﯽ ﮐﮯ ﭼﮫ ﺩﻓﺘﺮ ﮐﺎﻥ ﭘﻮﺭ ﮐﮯ ﺑﮩﺖ ﺻﺎﻑ، ﺭﻭﺷﻦ ﻭ ﺧﻮﺷﻨﻤﺎ ﭼﮭﭙﮯ ﮨﻮﺋﮯ ﺩﮐﮭﺎﺋﯽ ﺩﯾﮯ ﺍﻭﺭ ﻃﺒﯿﻌﺖ ﻟﻠﭽﺎ ﺍﭨﮭﯽ۔ ﺍﻥ ﺑﮯﭼﺎﺭﮮ ﻧﮯ ﺑﮍﯼ ﺧﻮﺷﯽ ﺳﮯ ﺍﯾﮏ ﺍﯾﮏ ﺩﻓﺘﺮ ﺩﯾﻨﺎ ﺷﺮﻭﻉ ﮐﺮ ﺩﯾﺎ۔ ﮐﺘﺎﺏ ﺷﺮﻭﻉ ﮐﺮﻧﮯ ﮐﯽ ﺩﯾﺮ ﺗﮭﯽ ﮐﮧ ﯾﮧ ﻣﻌﻠﻮﻡ ﮨﻮﺍ ﮐﮧ ﮐﺴﯽ ﻧﮯ ﺟﺎﺩﻭ ﮐﺮ ﺩﯾﺎ۔ ﮐﺘﺎﺏ ﺍﺏ ﭼﮭﻮﮌﻧﺎ ﭼﺎﮨﻮﮞ ﺑﮭﯽ ﺗﻮ ﮐﺘﺎﺏ ﻣﺠﮭﮯ ﻧﮩﯿﮟ ﭼﮭﻮﮌ ﺭﮨﯽ ﮨﮯ۔ ﯾﺎﺩ ﻧﮩﯿﮟ ﮐﮧ ﮐﺘﺎﺏ ﮐﺘﻨﮯ ﻋﺮﺻﮯ ﻣﯿﮟ ﺧﺘﻢ ﮐﯽ۔ ﺑﮩﺮﺣﺎﻝ ﺟﺐ ﺑﮭﯽ ﺧﺘﻢ ﮐﯽ، ﺗﻮ ﺍﺗﻨﺎ ﯾﺎﺩ ﮨﮯ ﮐﮧ ﺩﻝ ﻣﻤﺘﺎﺯ ﻣﯿﺎﮞ ﮐﺎ ﻧﮩﺎﯾﺖ ﺩﺭﺟﮧ ﺍﺣﺴﺎﻥ ﻣﻨﺪ ﺗﮭﺎ ﮐﮧ ﯾﮧ ﻧﻌﻤﺖ ﺑﮯﺑﮩﺎ ﺍﻧﮭﯽ ﮐﮯ ﺫﺭﯾﻌﮯ ﮨﺎﺗﮫ ﺁﺋﯽ ﺗﮭﯽ۔ ﺷﮑﻮﮎ ﻭ ﺷﺒﮩﺎﺕ ﺑﻐﯿﺮ ﮐﺴﯽ ﺭﺩ ﻭ ﻗﺪﺡ ﻣﯿﮟ ﭘﮍﮮ، ﺍﺏ ﺩﻝ ﺳﮯ ﮐﺎﻓﻮﺭ ﺗﮭﮯ ﺍﻭﺭ ﺩﻝ ﺻﺎﺣﺐ ﻣﺜﻨﻮﯼ ﭘﺮ ﺍﯾﻤﺎﻥ ﻟﮯ ﺁﻧﮯ ﮐﮯ ﻟﯿﮯ ﺑﮯﻗﺮﺍﺭ ﺗﮭﺎ ! ‏( ﺹ ۱۵۲، ۲۵۲ ‏)
” ۲۳ﺀ ﮐﺎ ﻏﺎﻟﺒﺎً ﺳﺘﻤﺒﺮ ﺗﮭﺎ ﮐﮧ ﻣﮑﺘﻮﺑﺎﺕ ﻣﺠﺪﺩ ﺳﺮﮨﻨﺪﯼ ﮐﮯ ﻣﻄﺎﻟﻌﮧ ﮐﯽ ﺗﻮﻓﯿﻖ ﮨﻮﺋﯽ۔ ﺑﮍﺍ ﺍﭼﮭﺎ ﻧﺴﺨﮧ، ﺧﻮﺏ ﺧﻮﺵ ﺧﻂ ﻭ ﺭﻭﺷﻦ ﺍﭼﮭﮯ ﮐﺎﻏﺬ ﭘﺮ، ﺣﺎﺷﯿﮧ ﮐﮯ ﺳﺎﺗﮫ ‏( ﻣﺜﻨﻮﯼ ﮐﮯ ﮐﺎﻥ ﭘﻮﺭﯼ ﺍﯾﮉﯾﺸﻦ ﮐﯽ ﻃﺮﺡ ‏) ﻧﻮ ﺣﺼﻮﮞ ﻣﯿﮟ ﺍﻣﺮﺗﺴﺮ ﮐﺎ ﭼﮭﭙﺎ ﮨﻮﺍ ﻣﻞ ﮔﯿﺎ۔ ﺍﺱ ﻧﮯ ﻃﺒﯿﻌﺖ ﭘﺮ ﺗﻘﺮﯾﺒﺎً ﻭﯾﺴﺎ ﮨﯽ ﮔﮩﺮﺍ ﺍﺛﺮ ﮈﺍﻻ ﺟﯿﺴﺎ ﺗﯿﻦ ﭼﺎﺭ ﺳﺎﻝ ﻗﺒﻞ ﻣﺜﻨﻮﯼ ﺳﮯ ﭘﮍ ﭼﮑﺎ ﺗﮭﺎ۔ ﻓﺮﻕ ﺍﺗﻨﺎ ﺗﮭﺎ ﮐﮧ ﻣﺜﻨﻮﯼ ﻧﮯ ﺟﻮﺵ ﻭﻣﺴﺘﯽ ﮐﯽ ﺍﯾﮏ ﮔﺮﻣﯽ ﺳﯽ ﭘﯿﺪﺍ ﮐﺮ ﺩﯼ ﺗﮭﯽ۔ ﺑﺠﺎﺋﮯ ﺍﺩﮬﺮ ﺩﮬﺮ ﮐﯽ ﺁﻭﺍﺭﮦ ﮔﺮﺩﯼ ﺍﻭﺭ ﮨﺮ ﺻﺎﺣﺐ ﻣﺰﺍﺭ ﻭ ﺻﺎﺣﺐ ﺁﺳﺘﺎﻧﮧ ﺳﮯ ﻟﻮ ﻟﮕﺎﻧﮯ ﮐﮯ، ﺍﺏ ﻣﺘﻌﯿﻦ ﺷﺎﮨﺮﺍﮦ ﺍﺗﺒﺎﻉ ﺷﺮﯾﻌﺖ ﮐﯽ ﻣﻞ ﮔﺌﯽ۔ ﻣﻨﺰﻝ ﻣﻘﺼﻮﺩ ﻣﺘﻌﯿﻦ ﮨﻮ ﮔﺌﯽ ﮐﮧ ﻭﮦ ﺭﺿﺎﺋﮯ ﺍﻟٰﮩﯽ ﮨﮯ، ﺍﺱ ﮐﮯ ﺣﺼﻮﻝ ﻭ ﻭﺻﻮﻝ ﮐﺎ ﺫﺭﯾﻌﮧ ﺍﺗﺒﺎﻉ ﺍﺣﮑﺎﻡ ﻣﺼﻄﻔﻮﯼ ﮨﮯ۔ ﻣﺜﻨﻮﯼ ﺍﻭﺭ ﻣﮑﺘﻮﺑﺎﺕ، ﺩﻭﻧﻮﮞ ﮐﺎ ﯾﮧ ﺍﺣﺴﺎﻥ ﻋﻤﺮ ﺑﮭﺮ ﺑﮭﻮﻟﻨﮯ ﻭﺍﻻ ﻧﮩﯿﮟ۔ ﺭﺍﮦ ﮨﺪﺍﯾﺖ ﺟﻮ ﮐﭽﮫ ﻧﺼﯿﺐ ﮨﻮﺋﯽ، ﮐﮩﻨﺎ ﭼﺎﮨﯿﮯ ﮐﮧ ﺑﺎﻵﺧﺮ ﺍﻧﮭﯿﮟ ﺩﻭﻧﻮﮞ ﮐﮯ ﻣﻄﺎﻟﻌﮧ ﮐﺎ ﺛﻤﺮﮦ ﮨﮯ۔ “ ‏( ﺹ ۲۵۷ ‏)
ﻣﻮﻻﻧﺎ ﻋﺒﺪﺍﻟﻤﺎﺟﺪ ﺩﺭﯾﺎﺑﺎﺩﯼ ﮐﯽ ﺁﭖ ﺑﯿﺘﯽ ﮐﺎ ﯾﮧ ﭘﻮﺭﺍ ﺣﺼﮧ ﻻﺋﻖ ﻣﻄﺎﻟﻌﮧ ﮨﮯ ﺍﻭﺭ ﺍﻧﺴﺎﻧﯽ ﻧﻔﺴﯿﺎﺕ ﺍﻭﺭ ﺗﺠﺮﺑﮯ ﮐﯽ ﺳﻄﺢ ﭘﺮ ﯾﮧ ﺳﻤﺠﮭﻨﮯ ﻣﯿﮟ ﺑﮩﺖ ﻣﺪﺩ ﺩﯾﺘﺎ ﮨﮯ ﮐﮧ ﮔﻤﺮﺍﮦ ﮐﻦ ﻧﻈﺮﯾﺎﺕ ﮐﯿﺴﮯ ﺍﻧﺴﺎﻥ ﮐﮯ ﻓﮑﺮ ﻭ ﺩﻣﺎﻍ ﮐﻮ ﻣﺘﺎﺛﺮ ﮐﺮﺗﮯ ﮨﯿﮟ ﺍﻭﺭ ﺍﻥ ﮐﺎ ﻣﺪﺍﻭﺍ ﮐﺮﺗﮯ ﮨﻮﺋﮯ ﮐﻦ ﻋﻠﻤﯽ ﻭ ﻧﻔﺴﯿﺎﺗﯽ ﺍﺻﻮﻟﻮﮞ ﮐﻮ ﻣﺪ ﻧﻈﺮ ﺭﮐﮭﻨﺎ ﭼﺎﮨﯿﮯ۔
ﺗﺤﺮﯾﺮ ﻋﻤﺎﺭ ﺧﺎﻥ ﻧﺎﺻﺮ